advertise1
advertise1

القواعد العشرون للجوّ الحرّ

* تم النشر بواسطة "Hanaa Gharib"(الاثنين ، 16 مايو 2016 - 08:03 ص)
القواعد العشرون للجوّ الحرّ

اشار د احمد الخطيب دكتور الاطفال الشهير الى القواعد العشرون لحماية الاطفال من موجة الحر الشديده التى تجتاح البلاد اليوم وهى:

١. متخرجوش الولاد

٢. اقعدوا في التكييف ،، ولو في مروحة شغلوها ،، ولو هنضطر نفتح الشباك يبقى فوط أو قماش مبلول على السلك عشان الهوا يبرد شويه..

٣. حمّوا الأطفال ولو مش سخنين ،،، ومياه وسوايل وعصير طول اليوم ،، ونخفف اللبس لقطعة واحده ،، أو نقعد البيبيهات بالبامبرز بس .

٤. ثلاث أكواب مياه بارده قليلاً صباحاً وعصراً ممكن يعوضوا كمية الفقد من المياه مع الحرارة العالية.

٥.متخرجوش ولادكم من البيت

٦. الأطفال هم أكثر الفئات عرضة للجفاف -لأسباب كتير جداً- المهم ،، الحرارة العالية أخطر عليهم من غيرهم،، عشان كده خلينا ف البيت

٧. لو مضطرين نخرج اولادنا ، يبقى بعد المغرب ،، ولو قبله يبقى معانا زجاجة أو ببرونة مياه ساقعه ،، نمشى في الظل ،، كل شوية نشرب البيبي أو الطفل "رشفة" ،، اللبس يبقى أبيض أو ألوان فاتحة ،، كاب أو برنيطة ،، نرجع بسرعة وناخد دش!

٨. علامات الجفاف :

الضعف العام ، العطش الشديد ، النوم وقلة النشاط، دخول العينين ، قلة التبول ، الزنّ المستمر مع اللهفة على الماء .
لو لقيتى حاجه منهم ،، نشترى محلول جفاف ونحل الكيس على ٢٠٠ مل ونشرب واحده واحدة لغاية ما الطفل يشبع ويتحسن.

٩. متخرجوش من العمارة 

١٠. الحرارة ممكن توصل ل ٤٩-٥٠ ،، واحتمالات "إرهاق الحرارة" و"ضربة الشمس" بيزيد جداً وأول الأعراض دى ارتفاع درجة حرارة الجسم > ٣٨ ،، الفكرة ان قياس الحرارة بالفم والإبط وحتى الأذن مش هيبقى دقيق ،، لازم نقيس الحرارة عن طريق الشرج ،، ونطرح نصف درجة .

١١. متخرجوش من الشقة

١٢. "الإجهاد الحرارى Heat exhaustion"

لو طنشنا الموضوع والطفل قعد فترة في الحر الشديد ،،، بيبدأ بدرجة حرارة بين ٣٨-٤٠ ،، وبييجى بإسهال !! آه ،، إسهال بدون نزلة معوية ،، دوخه او دوار ،، ضعف ، صداع ، ترجيع ، وساعات شد عضلى !!لو لقيتى الحاجات دى وابنك مأكلش حاجة من بره وريحة البراز مش سيئة للغاية ،، أرجوكى متتلخبطيش وتدى أنتينال وسمكتا ونانازوكسيد ،، لأ ،، انقلى الطفل لمكان بارد ، سوايل كتير ومياه بأه ومحلول جفاف ،، وطبعاً دش بارد..!

١٣. متخرجوش من أوضة النوم 

١٤. " ضربة شمس Heat stroke "

لو الموضوع زاد ،، الحرارة بتعلى فوق ٤٠ ،، الطفل فاقد الوعى او بادئ في إغماء ،، بالبلدى كده "مفرفر" ،، هلوسه ، صداع ، ترجيع !! فوراً نحطه تماما ف مياة بارده جداً ،، او كمادات مياة باردة ،، مع خوافض حرارة ،، ننقل مستشفى ونعلق محلول صوديوم وريدى !!

١٥. التمارين و الألعاب الحركية ممنوعة تماماً في الحر الشديد ،، لانها بتفقد السوايل عن طريق العرق ،، وده للأسف بيساعد على الجفاف وضربة الحرارة Exertional heat stroke،،
محبكتش النادى يا حبيبي دلوقتى نبقى نروح بالليل

١٦. متخرجوش من التلاجة

١٧. المشكلة الكبيرة لو ابنك أصلاً عنده جفاف -عشان نزلة معوية- مع الجو الصعب ده ،، ساعتها هنضطر نزود جرعات محلول الجفاف ،، ونزود السوايل بشكل عام ،، وأول ما تحس بان ابنك "مدروخ " أو " نايم " أو " سخن جامد" او بيرجع كل حاجة " ،، عالمستشفى فوراً 

١٨ . متخرجوش م الفريزر

١٩. خوافض الحرارة :

سيتال آمن من عمر يوم ،، بروفين من ٦ شهور ، دولفين وڤولتارين من خمس سنوات ،، في لبوس سيتال وابيمول كبديل . 

٢٠. نأجل المواعيد اللى ممكن تتأجل ،، حتى زيارات الطبيب لو ممكن نتعامل في البيت بلاش نروح،، ،، ناخد قزازة مياه ساقعة نديها للغلبان اللى بيكنس الشارع😭 ،، والتعبان اللى واقف ع الإشارة😭،، وأى بنى آدم تقابله ف وشك بكرة في الجوّ ده صدقنى غلبان😭 ،، وهيفرح بالمياه دى جداً ،، وهتاخد ثواب إرواء عطشان

أضف تعليق .....

مشاركتك بالتعليق تعنى أنك قرأت بروتوكول نشر التعليقات على شرم بوست، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من شرم بوست

advertise3

تابعنا

القائمة البريدية

اشترك فى قائمتنا البريدية ليصلك كل ما هو جديد

شارك برأيك

هل سيأثر تفجير الكنيسة البطرسية على السياحة بشرم الشيخ؟
نعم
لا
ربما
advertise4
advertise2
advertise1